Në bulevardin kryesor të Tiranës, disa ditë më parë ndodhi një aksident i rëndë, ku një automjet përplasi tre fëmijë të mitur që po lëviznin me monopatina.
Sipas të dhënave paraprake, fëmijët kishin hyrë në rrugë teksa semafori ishte i kuq për ta, ndërsa makina ka kaluar në çastet e fundit të dritës jeshile ose me të verdhë.
Eksperti i sigurisë rrugore, Arben Luzi, në një intervistë për News 24, theksoi se monopatinat nuk duhet të tejkalojnë shpejtësinë prej 25 km/h dhe apeloi për miratimin e një rregulloreje të posaçme për përdorimin e tyre.
Ai theksoi gjithashtu rëndësinë e edukimit të përdoruesve të monopatinave, përdorimit të kaskës mbrojtëse, regjistrimit të mjetit dhe ndjekjes së një kursi bazë për njohjen e rregullave të qarkullimit, të ngjashëm me ato që ofron Kryqi i Kuq.
Arben Luzi, ekspert sigurie: Ishin tre fëmijë të mitur që u aksidentuan, nën 18 vjeç pra ishin. Janë të mitur dhe nuk merren në përgjegjësi penale. E para është që të kenë shërim të shpejtë, marrim pjesë dhe ne në dhimbjen e tyre, patjetër. Tre fëmijë po qarkullonin në monopatinë dhe një makinë ka hyrë dhe ka hyrë në fundin e dritës së fundit të semaforit ose ka hyrë me dritë të verdhë. Fëmijët kanë hyrë me dritën e semaforit të kuq. Këto janë informacione paraprake. Janë fëmijë që nuk njohin asnjë rregull rrugor. Në rrugë dalin edhe biçikletat, edhe monopatinat. Monopatinat lëvizin me motor dhe shpejtësia maksimale e tyre nuk duhet të kalojë 25 km/orë. Një monopatinë e fuqishme njëherë lëvizi 100 km/orë. Njeriu që do të lëvizë me monopatinë, duhet të ketë dijeni për lëvizjen në rrugë. Duhet të lëvizin në kolonë. Drejtuesit e këtyre mjeteve duhet të edukohen. Duhet të edukohet drejtuesi i monopatinës sesi të lëvizë. Monopatina merr një person, jo shumë persona. Prindi, derisa i blen fëmijës monopatinë, t’i kërkojë fëmijës disa rregulla sesi të ngasë këtë mjet. Në Tiranë ka përdorim masiv të monopatinave. Parlamenti të vendosë ligj, që kush drejton monopatinë me mbi 25 km/orë të marrë gjoba. Këtu ka vakum ligjor. Drejtuesit e monopatinave duhet të bëjnë një kurs për njohje të rregullave të qarkullimit rrugor, si Kryqi i Kuq. Duhet të lëvizë me kaskë në kokë, duhet të ketë prim sigurimi, sepse mund të dëmtojë dikë. Kjo duhet të bëhet, sepse është mjet me motor. Monopatinat nuk mund të ecin në rrugë ku thotë se ecet me 50 km/orë.
