Ish-prokurori i Durrësit dhe aktualisht deputet i zgjedhur i Partisë Demokratike, Arjan Ndoja, ka dëshmuar në Gjykatën e Posaçme në lidhje me atentatin ndaj tij të ndodhur më 1 nëntor 2019.
Ndoja është dëshmitari i parë në procesin gjyqësor ndaj të pandehurve Plaurent Dervishaji ekstraduar nga Dubai dhe Julian Meçe, të akuzuar për organizimin dhe ekzekutimin e sulmit të armatosur.
Në dëshminë e tij, Ndoja tregoi detaje nga momentet e ngjarjes, ku automjeti me të cilin udhëtonte së bashku me shoferin Andi Maloku dhe Aleksandër Lahon (i njohur si “Rrumi i Shijakut”) u qëllua me dhjetëra plumba.Ai tha se breshëria e të shtënave zgjati rreth 10 sekonda. Nga atentati mbeti i vrarë shoferi Maloku, ndërsa Ndoja dhe Laho u plagosën.
Dëshmia e Arjan Ndojës:
Në 2019 kam banuar në Tiranë, me punë kam qenë në Durrës. Gjatë muajit kam banuar në qytetin e Shëngjinit për periudhën që ti më pyet. Kam pasur makinë Mercedes Benz, automjetin e drejtonin të gjithë personat e familjes. Gjate muajit tetor të 2019 kam marrë një djalë në punë, i cili fatkeqësisht nuk jeton më, Andi Maloku. Ka qëndruar me mua rreth një muaj, më shumë i kam dhënë unë makinës sesa ai, thjesht doja të ishte. Përveç situatës që u godita me armë zjarri, nuk ka diçka tjetër.
Ka qenë data 1 nëntor, ora 13:00. Konsumuam drekë me ca miq, kemi ndenjur deri rreth orës 16:00. Kam qenë me shoferin Andi Maloku, dhe Aleksandër Lahon. Këtë e kam njohur si avokat. Në makinë drejtues mjeti ka qenë Andi Maloku, unë isha në sediljen e pasagjerit, pas ishte Aleksandër Laho. Unë do kthehesha për shtëpi, edhe ai për shtëpi, kemi pasur një segment të përbashkët rruge. Te pjesa e parkimit të lokalit, kemi ndenjur 10 minuta, nuk e di a ka pasur njeri.
Itinerari, te ura e Dajlanit, pastaj te mbikalimi, sa kaluam në mbikalim, filluan të shtënat. Nuk e kuptova fillimisht, mu duk si plastmas, plumbat vinin nga mbrapa. Nuk kemi arritur ta shohim makinën, se nuk arrim dot. Të shtënat kanë qenë nga dy armë, se dallohet zhurma e ndryshme. Kanë qenë të shtëna, por jo breshëri. S’jam e sigurt sa, por 13 predha duhet të jenë.
Makina u ngadalësua nga i ndjeri. Vetëm 3 minuta kam qenë koshient, jam rrëzuar në tokë pasi dola nga makina, isha pa ndjenja 6-7 minuta dhe e kam pa veten në spital. Momentin që ka hapur derën, ndjesë pastë, Andi ra, duhet të ketë pasur dhimbje. Se ia doli të dalë nga makina. Është si xhep vendi ku na goditën. Nuk kam dijeni kush më ka qëlluar. Nuk kam pasur absolutisht me asnjë njeri asnjë problem, as me kthyer kokën mbrapa as majtas. Nuk kam pasur, e nuk kam shqetësime.
Fizikisht njoh vetëm këtë njeriun këtu (Plarent Dervishaj). Kam qenë në një takim një herë me një avokat. Unë motivin dua të di. Kam dëgjuar nga shtypi, nga shkresat që më keni nisur ju, por nuk e di pse e kanë bërë. Nuk i kam borxh askujt, më intereson arsyeja. Kam një shtëpi në Shëngjin. Aty kam qëndruar. Nuk kam parë automjete të dyshimta, ndoshta ju duket e habitshme, por nuk kam pasur asnjë shqetësim. Edhe sot, pas 6 vitesh, të dalë dikush të më thotë se ça borxhi u kam.
I vetmi shqetësim i imi ka qenë nga kryeministri, ish zv kryeministri, që kanë bërë deklarata publike për mua dhe për vetingun e famshëm. Janë bërë lëvizje mashtruese në rotondo, që teknikisht të ndryshosh. Unë vetëm një shqetësim kam pasur në atë kohë, deklaratat e drejtuesve të qeverisë. Sepse mendoja që mund të më vinin operacionalen, ose të më bënin presion me vetingun. Të vetmet lëvizje mashtruese që kam bërë në atë kohë ka qenë për të evitoj operacionalen. Është goditur prokurori, jo Arjan Ndoja. Arjan Ndoja ja ku është.
Sipas të dhënave të SPAK, atentati ishte i mirëorganizuar. Të pandehurit, në bashkëpunim me persona të tjerë, kishin ngritur të gjithë infrastrukturën e nevojshme për kryerjen e vrasjes, përfshirë sigurimin e armëve, mjeteve të transportit, targave të vjedhura dhe informacionit për lëvizjet e shënjestrave, të cilat dyshohet se janë marrë edhe nga bazat e të dhënave shtetërore.
Nga hetimet janë identifikuar 9 persona të përfshirë në atentat, 5 prej tyre janë arrestuar, ndërsa 4 të tjerë janë ende në kërkim. Shumica janë anëtarë të dyshuar të grupit kriminal të Durrësit.
Ndërkohë, Arjan Ndoja është shkarkuar nga detyra si prokuror pas procesit të vettingut, por është rikthyer në jetën publike si deputet nga lista e hapur e PD për qarkun e Durrësit. Procesi në GJKKO vijon.
