Gjykata e Lartë ka rrëzuar rekursin e bërë nga Ajola Xoxa dhe nëna e saj, Valbona Xoxa, lidhur me vendimin e Apelit për sekuestrimin e një pasurie të paluajtshme në zonën e Qerretit.
Vendimi konfirmon masën e sekuestros preventive të vendosur më herët nga SPAK në muajin mars.
Në rekurs ishin përfshirë edhe dy shoqëri të lidhura me këtë pasuri, të cilat po ashtu kishin kërkuar heqjen e sekuestros.
Ajola Xoxa ndodhet nën hetim për disa akuza të rënda penale, në kuadër të një dosjeje të zgjeruar që përfshin dhe bashkëshortin e saj, ish-kryetarin e Bashkisë së Tiranës, Erion Veliaj.
Sipas SPAK, ajo akuzohet për:
korrupsion pasiv të funksionarëve të lartë shtetërorë ose vendorë, në bashkëpunim (nëntë herë);
pastrim të produkteve të veprës penale ose veprimtarisë kriminale;
fshehje apo deklarim të rremë të pasurive dhe interesave private.
Prokuroria Speciale pretendon se ka zbuluar një skemë të organizuar, ku Xoxa, në bashkëpunim me bashkëshortin e saj, dyshohet se ka krijuar një rrjet përfitimesh të paligjshme përmes fondesh publike të Bashkisë së Tiranës.
Skema, sipas hetimeve, synonte përfitime personale dhe familjare, të realizuara përmes manovrave financiare të kamufluara dhe në kundërshtim me ligjin.
Fillimisht, ndaj Xoxës ishte vendosur masa e sigurisë “arrest në shtëpi”, por më pas Gjykata e Posaçme vendosi ta zbusë këtë masë në “detyrim për paraqitje”.
