Mbrëmja e së mërkurës solli një spektakël të rrallë në skenën e Teatrit Kombëtar të Operas dhe Baletit, ku mbi 170 artistë u bashkuan në një interpretim madhështor të kryeveprës botërore “Carmina Burana” nga kompozitori gjerman Carl Orff.
Mes tyre ishte edhe kori i Zërave të Bardhë, i cili u bashkua me artistët profesionistë, duke i dhënë ngjyrë të veçantë kësaj shfaqjeje.
Koncerti u dirigjua nga maestros Sergio Alapont dhe Dritan Lumshi, ndërsa në rolet solistike interpretuan sopranoja Eva Golemi, sopranoja Nina Muho, tenori Matias Xheli dhe baritoni Armando Likaj. Shfaqja do të vijojë edhe sonte për publikun artdashës.
Sopranoja Nina Muho ndau emocionet e saj për rolin delikat që interpreton: “Personazhi im është i ndjeshëm dhe i ngarkuar emocionalisht. Ai shpreh ndjesi të dashurisë së një vajze në një lëndinë, delikatesën dhe epshin, por edhe thellësinë e ndjenjave njerëzore. Muzika është rrënqethëse dhe vepra flet fuqishëm për rrotën e fatit që të ngre dhe të zbret në mënyrë të pashmangshme, ndonjëherë edhe pa dijeninë tënde.”
Edhe baritoni Armando Likaj e cilëson rolin e tij si ndër më sfiduesit në aspektin vokal: “Ky rol kërkon një teknikë vokale të përkryer. Ajo që e bën të veçantë këtë vepër është kontrasti i vazhdueshëm midis së shenjtës dhe profanes. Ajo luan me tensionet e përhershme njerëzore, me pyetje që shpesh mbeten pa përgjigje dhe me lirinë që njeriu kërkon në mënyrë të pandalshme.”
“Carmina Burana” u kompozua në vitet 1935–1936 dhe u interpretua për herë të parë më 8 qershor 1937 në Operën e Frankfurtit.
Ajo bazohet në 24 poezi të marra nga një koleksion mesjetar i shkruar në latinisht dhe gjuhë të tjera të periudhës. Vepra është pjesë e triptikut muzikor Trionfi, së bashku me “Catulli Carmina” dhe “Trionfo di Afrodite”.
Pjesa hapëse dhe mbyllëse, “Fortuna Imperatrix Mundi” (“Fati, Perandoresha e Botës”), njihet për muzikën dramatike të “O Fortuna”, e cila mbetet një nga fragmentet më të fuqishme dhe të njohura të muzikës korale në botë.
