Valët e të nxehtit që kanë përfshirë vendin këto ditë po ndikojnë ndjeshëm në shëndetin e të moshuarve dhe pacientëve me sëmundje kronike.
Në qendrat shëndetësore është vënë re një rritje e ndjeshme e vizitave, kryesisht nga persona që vuajnë nga hipertensioni dhe diabeti, të cilët ankohen për luhatje të tensionit dhe ulje të nivelit të sheqerit në gjak.
Sipas mjekes së familjes, Antia Haxhiraj, ekspozimi në temperatura të larta, sidomos në oraret e pikut, është një nga faktorët kryesorë që po përkeqëson gjendjen e këtyre pacientëve.
“Pacientët kronikë si ata me hipertension apo diabet kanë nevojë për kujdes të shtuar gjatë këtyre ditëve. Është shumë e rëndësishme të qëndrojnë të hidratuar dhe të shmangin daljet gjatë mesditës,” thekson Haxhiraj.
Qëndrimi në mjedise të freskëta është këshilla kryesore e mjekes, por sigurisht kërkon të bëhet kujdes me përdorimin e kondicionerit pasi mund të ketë pasoja.
“Ndryshimet e forta të temperaturës në ambiente të brendshme mund të shkaktojnë tharje të mukozave, probleme me rrugët e sipërme të frymëmarrjes dhe shqetësime të tjera, veçanërisht për të sëmurët kronikë,” shton ajo.
Mjekët apelojnë për një kujdes të shtuar për të gjitha grupmoshat gjatë verës, duke këshilluar konsum të lartë të ujit, fruta dhe perime të freskëta, si dhe shmangie të aktivitetit fizik në orët e nxehta të ditës.
