Rreth tetë muaj pas dërgimit të dosjes në gjykatë për ish-kreun e Urdhrit të Stomatologut, Nikoll Deda, ai është arrestuar me kërkesë të prokurorit të Tiranës, Bledar Valikaj.
Policia ka ekzekutuar urdhrin e arrestit me burg për 70-vjeçarin, i cili dyshohet se mund të ndikojë në hetim ose të shmanget nga drejtësia.
Në nëntor 2024, ndaj Dedës u ngritën tri akuza: “Vjedhje e kryer duke shpërdoruar detyrën”, “Shpërdorim detyre” dhe “Veprime në kundërshtim me vendimin e gjykatës”.
Denoncimi erdhi nga një qytetar, ndërsa hetimet tregojnë se ai ka keqpërdorur fonde dhe ka punësuar familjarë në mënyrë të paligjshme.
Prokuroria thekson se nga veprimet hetimore të policisë gjyqësore është evidentuar rreziku që Deda të ikë ose të pengojë hetimin.
Megjithëse është nën hetim për një çështje tjetër, ku akuzohet për shkelje të nenit 320 të Kodit Penal, ai vazhdonte të kryente veprime që dyshohet se përbëjnë shpërdorim detyre, duke centralizuar kompetencat dhe duke shfrytëzuar strukturat e Urdhrit.
Sipas hetimeve, buxheti i Urdhrit të Stomatologëve është rritur në mënyrë të dyshimtë: nga 38.5 milionë lekë në vitin 2020, në 52 milionë lekë në 2021 dhe në mbi 125 milionë lekë në 2022, pjesërisht për shkak të blerjes së një godine të re dhe investimeve.
Prokuroria dyshon se këto shifra janë përdorur për përfitime personale, jo për nevoja institucionale.
Gjithashtu, Deda akuzohet se ka punësuar familjarë dhe të fejuarit e djemve pa ndjekur kriteret ligjore, me qëllim të forcimit të kontrollit të tij personal mbi institucionin dhe ndikimin në vendimet e Këshillit Kombëtar të Urdhrit të Stomatologëve.
