Në orët e para të mëngjesit të së shtunës, qindra raketa iraniane u lëshuan nga Teherani dhe Kermanshahu në drejtim të objektivave strategjike në Izrael, përfshirë Tel Avivin dhe Jerusalemin.
Sirenat e alarmit për sulm ajror u dëgjuan në të dy qytetet, duke detyruar banorët të kërkojnë strehim nën tokë.
Sipas autoriteteve izraelite, të paktën 80 persona janë plagosur, ndërsa tre humbën jetën si pasojë e goditjeve. Disa nga të plagosurit ndodhen në gjendje kritike.
Sulmi iranian u pasua nga një kundërpërgjigje masive e Forcave Ajrore të Izraelit, të cilat gjatë natës goditën rreth 200 objektiva ushtarake dhe bërthamore në territorin iranian, përfshirë centralet në Natanz, Fordow dhe Isfahan, si dhe rezidencën e udhëheqësit suprem Ali Khamenei dhe aeroportin Mehrabad në Teheran.
Zyrtarët izraelitë konfirmuan se janë eliminuar 20 komandantë të lartë ushtarakë iranianë dhe 7 shkencëtarë të përfshirë në programin bërthamor.
Përfaqësuesi i Iranit në OKB deklaroi se si pasojë e sulmeve izraelite, 78 persona kanë humbur jetën dhe mbi 320 janë plagosur, shumica civilë.
Ndërkohë, Garda Revolucionare iraniane ka paralajmëruar se do të vazhdojë sulmet dhe është e gatshme të lëshojë deri në 2.000 raketa të tjera, duke kërcënuar me një valë shkatërrimi “20 herë më të fuqishme”.
Tensioni u ndez fillimisht pas një sulmi ajror izraelit të premten mbi baza ushtarake iraniane, ku u vranë tre komandantë të lartë të Gardës Revolucionare. Irani e konsideroi këtë si shkelje të sovranitetit të tij dhe reagoi me një përgjigje të organizuar me raketa.
Ministri i Jashtëm iranian, Abbas Araghchi, në një sërë bisedash telefonike me liderë ndërkombëtarë, deklaroi se mbrojtja e sovranitetit të Iranit është e panegociueshme dhe akuzoi shtetet perëndimore për mbështetje të njëanshme ndaj Izraelit.
Ndërkohë, përplasja po dëmton rëndë edhe përpjekjet diplomatike për ringjalljen e marrëveshjes bërthamore me Iranin. Raundi i gjashtë i bisedimeve SHBA-Iran, i planifikuar për të dielën në Muskat, rrezikon të dështojë për shkak të përshkallëzimit.
Uashingtoni, megjithëse mohoi përfshirjen në sulmet izraelite, u shpreh se ishte informuar paraprakisht.
Përfaqësuesi amerikan në OKB, McCoy Pitt, paralajmëroi se “udhëheqja iraniane duhet të veprojë me maturi dhe të rikthehet në negociata”, duke nënvizuar se SHBA nuk do të lejojë kurrë që Irani të prodhojë një armë bërthamore.
Nga ana tjetër, ambasadori izraelit në OKB, Danny Danon, theksoi se Izraeli ka duruar për shumë kohë: “Ne kemi pritur që diplomacia të funksionojë. Tani është koha për veprim. Ne do të çmontojmë programin bërthamor të Teheranit”.
Sekretari i Përgjithshëm i OKB-së, Antonio Guterres, bëri thirrje të menjëhershme për ndalimin e përshkallëzimit: “Mjaft me raketat, mjaft me vdekjet. Koha për të ndaluar.”
