Artan Tafani, bashkëpunëtori i drejtësisë, ka dhënë një tjetër dëshmi të fortë në Gjykatën e Posaçme, duke zbuluar prapaskenat e atentatit ndaj Kujtim Metës.
Sipas tij, ngjarja nisi pas një konflikti të dhunshëm mes Metës dhe babait të Laert Haxhiut.
“E kishte goditur me grushte babanë e Laertit dhe donin ta vrisnin me thikë, për të mos u zbuluar”, deklaroi Tafani para trupit gjykues.
Në dëshminë e tij, Tafani përmendi edhe Dorian Shurdhin, mik i Laert Haxhiut nga Belgjika, i cili në fillim kundërshtoi vrasjen duke u shprehur: “Do na kalbë në burg”. Megjithatë, plani vijoi dhe u ekzekutua në një lokal ku ndodhej Kujtim Meta. Tafani rrëfeu se hapi zjarr ndaj tij me një armë Zastava. “Qëllova tetë herë. Ai u hodh nga karrigia, por vazhdova ta qëlloja. Ika vetëm kur m’u mbaruan fishekët. Mesa mora vesh, një plumb e kishte kapur në bark,” tha ai.
Pas atentatit, Tafani u largua në këmbë duke kaluar shinat e trenit dhe më pas u mor me makinë. Arratisja u bë përmes Çermës në drejtim të Tiranës, pa ndaluar as kur u sinjalizuan nga policia.
Armët u eliminuan në të njëjtin vend ku ishte hedhur më herët edhe arma e përdorur në vrasjen e Albi Bashaliut.
Tafani ka deklaruar se gjatë atentatit ishte i maskuar me kapuç, xhup të trashë dhe maskë mbrojtëse për fytyrën, për të shmangur identifikimin.
Dëshmia e tij është një tjetër pjesë e mozaikut të një rrjeti të gjerë kriminal, që po zbulohet përmes rrëfimeve që tronditin opinionin publik.
