Një 59-vjeçar shqiptar ka mbetur rëndë i plagosur pasi u qëllua me armë zjarri në kokë në orët e para të mëngjesit të së dielës në Fontaniva, Itali. Viktima është identifikuar si Fatos Cenaj.
Fillimisht, kalimtarët menduan se ai kishte pësuar një aksident me biçikletë, pasi u gjet i shtrirë në rrugë, por kur mbërriti ekipi mjekësor, u zbulua se Cenaj kishte një plagë të shkaktuar nga armë zjarri në kokë.
Ai u transportua menjëherë në spital, ku ndodhet në gjendje kritike për jetën. Policia italiane ka nisur hetimet për të zbardhur rrethanat e ngjarjes së rëndë.
Deri tani janë sekuestruar pamjet nga kamerat e sigurisë në zonë dhe janë marrë në pyetje dëshmitarë që mund të ndihmojnë në identifikimin e autorit apo autorëve të mundshëm.
