Kryetari i Bashkisë së Himarës, Vangjel Tavo, ka pezulluar nga detyra pesë punonjës të Inspektoratit të Mbrojtjes së Territorit, pas dyshimeve për tolerim të ndërtimeve pa leje në zonat turistike të Drimadhes, Jalës dhe Dhërmiut.
Vendimi erdhi pas zbulimit të disa strukturave të ngritura pa autorizim, ndërsa pak ditë më parë janë kryer edhe procedime ligjore për këtë çështje. Mbrëmjen e së dielës, rreth orës 20:00, IKMT ndërhyri në Jalë duke shembur katër objekte të paligjshme, pa u hasur në kundërshtime. Të hënën, aksioni vijoi në Dhërmi, ku nisën prishjet e pesë ndërtimeve të tjera.
Sipas burimeve, në këto zona kishte filluar ngritja e kapanoneve me qëllim ruajtjen e pajisjeve të punës, si fazë paraprake për ndërtimet e mëvonshme.
Ndërhyrja e IKMT-së vjen në një moment të ndjeshëm, teksa ka nisur sezoni turistik dhe aktivitetet ndërtimore në zonat bregdetare po shtohen. Prishjet pritet të vazhdojnë edhe në ditët në vijim.
