Pas një telefonate mes ish-Presidentit amerikan Donald Trump dhe homologut të tij kinez Xi Jinping, është paralajmëruar një tjetër përpjekje për të zbutur tensionet tregtare mes dy ekonomive më të mëdha në botë.
Trump njoftoi se delegacione të nivelit të lartë nga të dyja vendet do të takohen të hënën në Londër për të vijuar diskutimet mbi një marrëveshje tregtare të përfolur që nga muaji maj.
Sipas një postimi të Trump në platformën e tij Truth Social, delegacioni amerikan do të përbëhet nga ministri i Financave Scott Bessent, ministri i Tregtisë Howard Lutnick dhe përfaqësuesi për çështjet tregtare, Jamieson Greer.
Trump u shpreh optimist për zhvillimin e bisedimeve: “Takimi pritet të shkojë shumë mirë.”
Kina, megjithatë, ka mbajtur një ton më të rezervuar pas telefonatës, duke i kërkuar SHBA-së të respektojë kushtet e vendosura në marrëveshje dhe të mos devijojë nga angazhimet e ndërsjella. Pekini theksoi se po e zbaton marrëveshjen me seriozitet dhe korrektësi.
Marrëdhëniet tregtare SHBA-Kinë kanë qenë të tensionuara gjatë presidencës Trump, i cili ndoqi një kurs agresiv, duke vendosur tarifa ndëshkuese ndaj mallrave kineze deri në 145%.
Kina iu kundërpërgjigj me masa të ngjashme. Në një takim të zhvilluar në Zvicër në maj, të dyja palët ranë dakord për një pauzë të përkohshme në përshkallëzimin e masave dhe për një ulje reciproke të tarifave.
Takimi në Londër shihet si një përpjekje për të rikthyer dialogun në një moment kyç për ekonominë globale./DW
