Një tërmet i fuqishëm me magnitudë 6.5 të shkallës Rihter ka goditur Kolumbinë mëngjesin e sotëm, duke shkaktuar panik në disa qytete të vendit.
Agjencia Kombëtare Gjeologjike bëri me dije se epiqendra e lëkundjeve ndodhej pranë zonës Paratembueno, ndërsa sipas Qendrës Sizmologjike Evropiane-Mesdhetare, tërmeti është regjistruar rreth 63 kilometra në verilindje të Villavicencios dhe 21 kilometra në lindje të Medinës.
Lëkundjet janë ndjerë rreth orës 08:08 të mëngjesit, sipas orës lokale, në një thellësi prej 35 kilometrash.
Megjithatë, burime të tjera raportojnë një thellësi më të vogël, rreth 10 kilometra, çka e ka rritur ndjeshmërinë e tërmetit dhe përhapjen e tij në një zonë më të gjerë.
Tërmeti është ndier deri në një rreze prej 700 kilometrash, duke prekur afërsisht 27 milionë banorë.
Në kryeqytetin Bogota, shumë qytetarë kanë dalë në rrugë të alarmuar, në pritje të informacioneve të mëtejshme nga autoritetet.
Deri tani nuk raportohet për viktima, ndërsa po bëhen verifikime për dëme të mundshme materiale.
Autoritetet janë në terren për të vlerësuar situatën dhe për të garantuar sigurinë e popullsisë.
