Bashkimi Evropian ka dalë në mbështetje të Gjykatës Ndërkombëtare Penale, pas vendimit të administratës amerikane për të sanksionuar katër gjyqtarë të këtij institucioni.
Sllovenia, një prej vendeve të prekura drejtpërdrejt nga sanksionet, ka njoftuar se do t’i kërkojë zyrtarisht Brukselit të veprojë për të siguruar që masa të tilla të mos kenë efekt në territorin evropian.
Presidentja e Komisionit Evropian, Ursula von der Leyen, u shpreh se GJNP ka një rol thelbësor në drejtësinë globale dhe duhet të veprojë e pavarur, pa presione politike.
“Gjykata Ndërkombëtare Penale i mban përgjegjës kryesit e krimeve më të rënda në botë dhe u jep zë viktimave. Duhet të jetë e lirë dhe pa asnjë presion”, deklaroi ajo në një postim në platformën “X”.
Edhe Antonio Costa, presidenti i Këshillit Evropian, vlerësoi GJNP-në si “themeli i drejtësisë ndërkombëtare”, duke kërkuar mbrojtje të integritetit dhe pavarësisë së saj.
Sanksionet e vendosura nga administrata e Donald Trump-it janë përgjigje ndaj veprimeve të GJNP-së, përfshirë lëshimin e urdhër-arresteve për kryeministrin izraelit Benjamin Netanyahu dhe hapjen e një hetimi për krime lufte të mundshme nga ushtarë amerikanë në Afganistan.
Në listën e gjyqtarëve të sanksionuar përfshihen:
• Solomy Balungi Bossa
• Luz del Carmen Ibanez Carranza
• Reine Adelaide Sophie Alapini Gansou
• Beti Hohler
Sipas sanksioneve, këtyre gjyqtarëve do t’u ngrihen asetet në SHBA dhe u ndalohet hapja e llogarive bankare në shumë vende të tjera, përfshirë partnerë ndërkombëtarë të sistemit financiar amerikan.
Gjithashtu, qytetarët amerikanë që ofrojnë ndihmë për individët e sanksionuar mund të përballen me gjoba.
Gjykata Ndërkombëtare Penale, e mbështetur nga 125 shtete anëtare, ka dënuar zyrtarisht vendimin e Uashingtonit, duke e konsideruar një sulm ndaj drejtësisë globale./ REL
