Futbollistët dhe stafi teknik i kombëtares serbe janë nisur drejt stadiumit “Air Albania” për seancën stërvitore zyrtare, nën masa të rrepta sigurie.
Që prej largimit nga hoteli ku janë akomoduar në Tiranë, lëvizja e tyre është shoqëruar nga dy autobusë dhe forca të shumta të Policisë së Shtetit, të cilat kanë siguruar itinerarin në çdo moment.
Hoteli ku është vendosur ekipi serb mbetet nën mbikëqyrje të vazhdueshme dhe kontrolle të forta sigurie.
Stërvitja në “Air Albania” do të paraprihet nga konferenca për shtyp e trajnerit serb dhe një prej lojtarëve të tij, në prag të përballjes me Shqipërinë më 7 qershor, në kuadër të kualifikueseve për Kupën e Botës 2026.
Federata Serbe e Futbollit, në një postim në rrjetet sociale, ka përshkruar udhëtimin drejt Tiranës si “një fluturim të këndshëm” dhe ka theksuar se pas mbërritjes në aeroport, lojtarët dhe stafi janë pritur menjëherë në pistë nga autobusët e dedikuar, të shoqëruar nga një eskortë e siguruar.
Trafiku gjatë këtij segmenti është bllokuar për delegacionin serb.
