Në emisionin “Me Zemër të Hapur” në News24 u trajtua rasti i plagosjes së një 15-vjeçari në picerinë “Fantazia” në zonën e Ali Demit.
Policia e Komisariatit nr.1 arrestoi Aldo Nezirin, 21 vjeç, i akuzuar për plagosje të rëndë me dashje dhe armëmbajtje pa leje. Ngjarja ndodhi rreth orës 17:10 të së dielës.
Në pranga përfunduan edhe pronari i picerisë, Leonardo Mejdani, dhe tre punonjësit Ferit Basha, Andi Hyka, dhe Keivin Bala, për moskallëzim krimi dhe pengim të drejtësisë.
Ata dyshohet se kanë pastruar vendin e ngjarjes dhe kanë fshirë pamjet nga kamerat e sigurisë.
Në një intervistë për emisionin, babai i 15-vjeçarit tregoi për plagën e djalit: “Djali është plagosur me plumb në qafë dhe autori e mbante armën përherë me vete. Nuk ka pasur asnjë konflikt paraprak, thjesht nxori armën dhe qëlloi drejt tij.” Ai shtoi se gjendja shëndetësore e djalit është përmirësuar dhe se djali ka pësuar një ndërhyrje kirurgjikale për të hequr plumbin. “Isha në punë në orën 5:30 dhe më mori kushëriri në telefon dhe më tha djali është dëmtuar pak tek qafa. Atë e kishin marrë në telefon grupi i gatshëm i urgjencës. Shkoj në spital urgjent e ç’të shihja. Ishte gjithçka një befasi. Djali i është nënshtruar një ndërhyrje kirurgjikale për të hequr plumbin që kishte në qafë.Kanë dashur të fshehin ngjarjen pasi kanë fshirë me facoleta gjurmët e gjakut. Më pas kanë shqyer pjesën e kamerave që filmojnë.Plumbi është plumb pistolete nuk është plumb stilolapsi. Djali kishte 1 muaj që punonte si kamerier dhe banakier në këtë piceri. Shkonte në shkollë dhe pasdite punonte aty. Kishte dëshirë të punonte, që të mos rrinte kot gjatë kohës së lirë”, tha ai.
