Korça çel zyrtarisht sezonin turistik me një atmosferë festive që nis që në orët e para të mëngjesit.
Rrugicat dhe sheshet e qytetit do të pushtohen nga ngjyra, ritmi dhe gëzimi, ndërsa trupa artistike me kostume karnavalesh do sjellin jetë dhe energji në çdo hapësirë publike.
Tek Pazari i Vjetër, do të prezantohet oferta turistike e qytetit dhe albumi fotografik “Korça The Heartland”, një udhëtim vizual që fton vizitorët të zbulojnë zemrën dhe shpirtin e Korçës.
Në mbrëmje, festa zhvendoset në bulevardin “Republika” dhe zonën këmbësore me paradën e madhe të karnavaleve, për të kulmuar me një “Carnival Party” ku do performojnë këngëtarja Rezarta Smaja dhe një DJ, në një mbrëmje të mbushur me muzikë dhe atmosferë elektrizuese.
Por kjo është vetëm nisja. Gjatë gjithë verës, Korça do të shndërrohet në një skenë të hapur kulturore me një kalendar të pasur festiv që sjell emocione për çdo shije.
Evente me jehonë ndërkombëtare si Spirit of Balkan, MIK Festival, Lumina Electronic Festival, Korça Beer Fest dhe netët romantike të Korça Serenights do të gjallërojnë qytetin pa ndërprerje.
Korça nuk është thjesht një destinacion pushimi, është një përvojë që të përfshin me kulturën, mikpritjen dhe gjallërinë që e karakterizon. Një qytet që të fton jo vetëm ta vizitosh, por ta përjetosh me të gjitha shqisat.
