Një fluturim i kompanisë “Ryanair” që kishte si destinacion Milanon, është detyruar të bëjë një ulje emergjente në Gjermani për shkak të kushteve ekstreme atmosferike.
Ngjarja ndodhi të mërkurën mbrëma, kur avioni u përfshi nga turbulenca të fuqishme gjatë fluturimit, duke shkaktuar lëndime te nëntë pasagjerë, përfshirë një fëmijë 2-vjeçar.
Sipas policisë së Bavarisë, piloti vendosi të devijonte itinerarin dhe të ulej urgjentisht në aeroportin e Memmingen, rreth 113 kilometra në perëndim të Mynihut.
Pas uljes së sigurt, ekipet mjekësore asistuan të lënduarit, mes tyre një grua me dëmtime në kokë, fëmija i saj me mavijosje dhe një grua tjetër 59-vjeçare me dhimbje në shpinë, të tre u dërguan në spital për trajtim.
Autoritetet gjermane nuk lejuan rifillimin e fluturimeve nga aeroporti i Memmingen, ndaj Ryanair organizoi transportin me autobus për të çuar pasagjerët drejt Milanos.
