Tre persona janë identifikuar si autorë të disa vjedhjeve në banesa dhe lokale në Tiranë. Dy prej tyre janë arrestuar, ndërsa i treti është shpallur në kërkim nga policia.
Gjatë operacionit, u sekuestruan bizhuteri, një shumë parash dhe një automjet, të dyshuara si të vjedhura.
Hetimet e kryera nga Komisariati Nr. 6, në bashkëpunim me Komisariatin Nr. 2, çuan në zbardhjen e katër rasteve konkrete vjedhjeje.
• Në pranga ka rënë 20-vjeçari E.D., ndërsa 21-vjeçari E.G. është në kërkim. Ata dyshohen se gjatë majit dhe qershorit kanë kryer vjedhje në një banesë dhe dy lokale;
• Po ashtu, u arrestua 33-vjeçari A.K., i cili dyshohet se një ditë më parë ka vjedhur një shumë parash në një banesë në fshatin Arbanë.
Policia po vijon punën për kapjen e 21-vjeçarit të shpallur në kërkim dhe për zbardhjen e rasteve të tjera të mundshme të vjedhjeve të kryera nga këta persona.
Dosja hetimore i është referuar Prokurorisë së Tiranës për veprime të mëtejshme.
