Presidenti amerikan Donald Trump ka rikthyer politikën e ndalimeve të udhëtimit, duke firmosur të mërkurën një shpallje të re që ndalon hyrjen në SHBA për shtetas nga një sërë vendesh, me arsyetimin e mbrojtjes së sigurisë kombëtare.
Lista përfshin: Afganistanin, Myanmarin, Çadin, Republikën e Kongos, Guinenë Ekuatoriale, Eritrenë, Haitin, Iranin, Libinë, Somalinë, Sudanin dhe Jemenin. Masa hyn në fuqi të hënën në mesnatë dhe shoqërohet me kufizime shtesë për udhëtarët nga Burundi, Kuba, Laosi, Sierra Leone, Togo, Turkmenistani dhe Venezuela.
“Duhet të veproj për të mbrojtur sigurinë dhe interesin kombëtar të Shteteve të Bashkuara dhe qytetarëve tanë,” deklaroi Trump në dokumentin zyrtar, duke u mbështetur në një urdhër ekzekutiv të nxjerrë më 20 janar, në ditën e nisjes së mandatit të tij.
Urdhri i kishte ngarkuar Departamentin e Shtetit, Departamentin e Sigurisë Kombëtare dhe agjencitë e inteligjencës të identifikonin shtetet që përbëjnë rrezik për vendin.
Kjo nuk është hera e parë që Trump miraton masa të tilla. Në janar 2017, ai kishte lëshuar një ndalim të ngjashëm për shtetasit e shtatë vendeve me shumicë myslimane, çka shkaktoi trazira në aeroportet ndërkombëtare dhe u sfidua në gjykata, derisa versioni i rishikuar u miratua nga Gjykata e Lartë në vitin 2018.
Ndërsa përkrahësit e presidentit e shohin këtë politikë si një masë të nevojshme për sigurinë kombëtare, kritikët e kanë quajtur diskriminuese dhe të motivuar politikisht, duke sjellë në kujtesë deklaratat e Trump gjatë fushatës së vitit 2016, kur ai kishte propozuar një ndalim të përgjithshëm për hyrjen e myslimanëve në SHBA.
