Gjykata e Durrësit ka vendosur të lirojë nga qelia Luis Xhumarin, pronarin e motorëve të ujit, i arrestuar pas vdekjes tragjike të një turisti britanik 34-vjeçar, Silvester Oleug.
Në vendim thuhet se ndaj tij do të zbatohet masa e sigurisë “arrest në shtëpi”, e cila do të kryhet në banesën e tij pranë Shkëmbit të Kavajës.
Ngjarja ndodhi më 2 qershor, kur turisti britanik ra nga një motor uji që kishte marrë me qira nga Xhumari dhe më pas u mbyt në det.
Pas incidentit, Policia e Durrësit e arrestoi Xhumarin në flagrancë, ndërsa Prokuroria hapi hetim penal për veprën “Shkelja e rregullave të mbrojtjes në punë”.
Gjykata vlerësoi se arrestimi ishte i ligjshëm, ndërsa urdhëroi prokurorinë të ekzekutojë masën e arrestit shtëpiak.
Po ashtu, vendimi mund të ankimohet në Gjykatën e Apelit të Tiranës brenda pesë ditëve nga njoftimi i tij.
