Tre motra të mitura janë gjetur të vdekura pranë qytetit Leavenworth, në Qarkun Chelan të shtetit të Uashingtonit, pasi ishin zhdukur gjatë një vizite tek babai i tyre, i cili rezulton i pastrehë. Policia konfirmoi ngjarjen tragjike ditën e martë, ndërsa vijon kërkimi për babanë 32-vjeçar, i cili akuzohet për rrëmbimin dhe vrasjen e tyre.
Trupat e motrave Paitin (9 vjeç), Evelyn (8 vjeç) dhe Olivia Decker (5 vjeç), u gjetën vonë të hënën mbrëma pranë një kamioni në një zonë kampingu në Wenatchee, aty ku ishte lokalizuar edhe automjeti i të atit. Në kërkime po ndihmonte edhe një helikopter i Sigurisë Kombëtare, sipas KIRO 7.
Policia e shtetit nuk aktivizoi menjëherë alarmin Amber, duke argumentuar se nuk ishin përmbushur kriteret për rrëmbim të dokumentuar apo për ndonjë rrezik të menjëhershëm për jetën e fëmijëve. Në vend të tij, ditën e shtunë u lëshua një alarm “Persona të Zhdukur në Rrezik”.
“Në këtë rast, bëhej fjalë për një prind me të drejta ligjore kujdestarie. Vonesa në kthimin e fëmijëve, ndonëse shqetësuese, nuk është në vetvete një tregues i rrëmbimit,” u shpreh zëdhënësi i Policisë së Shtetit, Chris Loftis. Ai pranoi dështimin e sistemit duke deklaruar: “Padyshim, këtë herë nuk funksionoi. Kemi tre fëmijë të vdekur.”
Në bashkëpunim me Shërbimin e Marshallëve të SHBA-së, autoritetet janë vënë në ndjekje të babait të fëmijëve, Travis Decker. Për çdo informacion që mund të çojë në arrestimin e tij, është ofruar një shpërblim deri në 20,000 dollarë.
Sipas policisë, Decker është një person i pastrehë që jetonte nëpër kampe dhe hotele në zonë, shpesh i shoqëruar me qenin e tij. Ai kishte marrë vajzat të premten dhe ishte parë gjatë fundjavës në anën perëndimore të Leavenworth, çka çoi në nisjen e një operacioni të gjerë kërkimi në zonat pyjore përreth.
Ekipi i Hetimit të Krimeve nga Policia e Shtetit të Uashingtonit mbërriti të hënën për të hetuar në kamionin e Deckerit dhe zonën përreth, hetime që pritet të përfundojnë brenda ditës së sotme.
Decker është ish-ushtar i Ushtrisë Amerikane dhe së fundmi kishte shërbyer në Gardën Kombëtare të Shtetit. Autoritetet kanë bërë të ditur se ai nuk kishte marrë pjesë në stërvitjet ushtarake të detyrueshme për më shumë se një vit dhe ndodhej në procesin e shkarkimit nga shërbimi.
