Një operacion i përbashkët mes SPAK dhe Policisë finlandeze ka çuar në goditjen e një rrjeti të strukturuar kriminal, që merrej me trafikun ndërkombëtar të drogave sintetike dhe kokainës drejt Finlandës.
Grupi kishte bazën në Shqipëri dhe shtrinte aktivitetin e tij në disa vende të BE-së, përfshirë Spanjën dhe Holandën, nga ku sigurohej lënda narkotike për t’u transportuar më pas në vendin nordik.
Sipas SPAK, grupi përbëhej nga 11 shtetas shqiptarë, të cilët vepronin nga qytete si Tirana, Vlora, Berati dhe Kuçova.
Komunikimi mes tyre dhe bashkëpunëtorëve jashtë vendit bëhej përmes aplikacioneve të koduara si Signal dhe Telegram.
Nga hetimi, janë lëshuar urdhër-arreste për 9 prej tyre, të cilët janë identifikuar me inicialet:
• B.S. (27.01.1985)
• E.A. alias E.T. (07.02.1991)
• A.M. (07.06.1981)
• K.Q. (14.04.1981)
• T.K. alias T.T. (15.10.1977)
• G.S. (05.07.1994)
• E.M. (29.05.1983)
• L.H. (09.01.1983)
• D.L. (07.06.1983)
Dy të tjerë janë ende në kërkim.
Gjatë zbatimit të masave të sigurisë, janë kryer kontrolle të shumta në banesa dhe biznese në Shqipëri dhe Finlandë.
Si rezultat, janë sekuestruar:
• 8 automjete
• 13 telefona celularë
• Dokumentacion dhe materiale të tjera me rëndësi për hetimin
Në operacion morën pjesë edhe agjentë të Byrosë Kombëtare të Hetimit, policisë së Helsinkit dhe Turkut, si dhe oficerë nga Zyra e Oficerit Ndërlidhës të Vendeve Nordike për Shqipërinë dhe Kosovën, të cilët luajtën një rol kyç në bashkëpunimin ndërkombëtar hetimor.
Hetimi është zhvilluar në kuadër të një skuadre të përbashkët hetimore dhe është mbështetur nga “Rrjeti @ON”, një iniciativë e financuar nga Komisioni Europian dhe e drejtuar nga Drejtoria Italiane e Hetimit Antimafia.
