Një operacion i përbashkët mes SPAK dhe autoriteteve finlandeze ka çuar në goditjen e një rrjeti kriminal të trafikut ndërkombëtar të drogës, i drejtuar nga shtetas shqiptarë me veprimtari në Spanjë dhe Finlandë.
Kreu i SPAK-ut, Altin Dumani, e cilësoi këtë ndërhyrje si një sukses të rëndësishëm në luftën kundër krimit të organizuar, falë një hetimi të gjatë e të thelluar, që rezultoi me 55 arrestime dhe sekuestrimin e 300 kg lëndë narkotike, përfshirë 170 kg amfetaminë, 10 kg kokainë dhe tableta të tjera narkotike.
Operacioni u finalizua mëngjesin e së martës, pas dy vitesh bashkëpunim mes institucioneve shqiptare dhe finlandeze.
Prokurorët Arben Kraja dhe Alfred Shehu dhanë detaje nga hetimet, të cilat nisën mbi bazën e informacioneve të marra nga autoritetet e huaja, duke u konkretizuar me krijimin e një skuadre të përbashkët hetimore në nëntor 2023.
Hetimi është kryer në mënyrë të fshehtë për më shumë se një vit, duke përdorur metoda speciale si përgjime, ndjekje dhe analiza financiare.
Shehu bëri të ditur se janë lëshuar gjithsej 11 urdhër-arreste, nga të cilat janë ekzekutuar 9, ndërsa për dy të tjerë vijojnë kërkimet.
Gjatë operacionit u sekuestruan gjithashtu 8 automjete, telefona celularë dhe dokumente të ndryshme që lidhen me aktivitetin kriminal të grupit. Hetimet do të vijojnë në fazën pasurore, për të zbuluar dhe konfiskuar çdo përfitim financiar të paligjshëm.
Sipas zyrtarit të antidrogës finlandeze, ky bashkëpunim dyvjeçar dëshmon rritjen e besimit dhe koordinimit mes institucioneve të drejtësisë në Evropë për të luftuar me efikasitet rrjetet kriminale ndërkombëtare, ku grupet shqiptare kanë një shtrirje të gjerë dhe të strukturuar.
