Policia e Shtetit ka finalizuar me sukses operacionin e koduar “Fake Star 5”, duke zbuluar dy fabrika në të cilat prodhoheshin veshje të kontrabanduara me logo të falsifikuara të markave të njohura ndërkombëtare.
Operacioni u zhvillua në zonën e Rrugës së Arbërit, konkretisht në fshatin Brrar, ku u zbuluan dy magazina të pajisura me linja të plota makinerish për qepje, printim dhe stampim të logos së markave të njohura. Hetimet zbuluan se këto objekte përdoreshin për prodhimin dhe shpërndarjen e veshjeve dhe aksesorëve të dyshuar si kontrabandë.
Të arrestuarit dhe të shpallurit në kërkim:
U arrestuan Luan Haka, Ali Bushati dhe Xhuljo Lecaj, të cilët ishin administratorë të këtyre fabrikave.
Në pranga përfundoi edhe Arjan Hida, qiradhënës i ambienteve ku funksiononin fabrikat.
Në kërkim janë shpallur Lindion Haka (djali i Luan Hakës), bashkëadministrator i njërës prej magazinave, si dhe Ozkan Sulun, shtetas turk i dyshuar si koordinatori kryesor i aktivitetit kriminal.
Ndërkohë, katër punonjës të fabrikave do të hetohen në gjendje të lirë: R. Gj., Z. H., Sh. M. dhe A. H.
Gjatë operacionit janë sekuestruar:
Sasi të konsiderueshme veshjesh të dyshuara si të kontrabanduara
Dhjetëra makineri për qepje, printim dhe stampim
Logo të falsifikuara të markave ndërkombëtare
Gjashtë dokumente personale të shtetasit turk
Një shumë parash në lekë
Njësi kompjuterike, celularë dhe dokumente të tjera që lidhen me aktivitetin kriminal
Akuza dhe hetime të mëtejshme:
Prokuroria e Tiranës ka marrë në dorë procedurat për vijimin e hetimeve për një sërë veprash penale, përfshirë:
“Shkelja e të drejtave të pronësisë industriale”
“Kontrabanda me mallra të tjera”
“Punësimi i paligjshëm”
“Fshehja e të ardhurave”
“Tregtimi dhe transportimi i mallrave që janë kontrabandë”
“Falsifikimi i vulave, stampave ose formularëve”
“Moskallëzimi i krimit”
Policia vijon punën për lokalizimin dhe kapjen e dy të shpallurve në kërkim, ndërsa operacione të tjera kundër krimit ekonomik priten të intensifikohen në vijim.
