Një tjetër telash për trajnerin Luciano Spalletti, teksa Italia humbet një tjetër titullar për ndeshjet e ardhshme kualifikuese.
Pas mbrojtësit Alessandro Buongiorno, edhe mesfushori Manuel Locatelli është larguar nga grumbullimi i kombëtares për shkak të një dëmtimi.
Pas stërvitjes së paradites së sotme, lojtari i Juventus-it shfaqi shqetësime në kyçin e këmbës dhe më pas iu nënshtrua ekzaminimeve mjekësore.
Sipas Federatës Italiane të Futbollit, testet konfirmuan një ndrydhje në kyçin e këmbës së djathtë, duke e bërë të pamundur aktivizimin e tij në sfidat ndaj Norvegjisë dhe Moldavisë.
“Manuel Locatelli largohet nga kampi stërvitor i kombëtares. Mesfushori, i padisponueshëm për ndeshjet e radhës për shkak të një ndrydhjeje në kyçin e këmbës së djathtë të pësuar gjatë stërvitjes së djeshme, do të rikthehet në klubin e tij,” thuhet në njoftimin zyrtar të Federatës.
Ky është një tjetër problem për trajnerin Spalletti, i cili duhet të riformatojë mesfushën për dy sfidat e radhës, ndërsa lista e mungesave vazhdon të zgjatet.
