Një prokurore në Sarandë është kanosur paraditen e së hënës brenda zyrës së saj, gjatë orarit të punës.
Ngjarja ndodhi në ambientet e Prokurorisë pranë Gjykatës së Shkallës së Parë të Juridiksionit të Përgjithshëm, ku dy gra u paraqitën për të kërkuar takim me prokuroren e gatshme.
Sipas burimeve paraprake, dy gratë e përfshira në incident janë të afërme të një të miture, e cila rezulton viktimë e një vepre penale të ndodhur pak ditë më parë në Sarandë.
Prokurorja kishte kërkuar ndaj të dyshuarit masën e sigurisë “arrest në shtëpi”, një vendim që nuk është pritur mirë nga të afërmet e vajzës.
Të pakënaqura nga masa e caktuar, ato kanë ofenduar dhe kërcënuar prokuroren brenda ambienteve të institucionit.
Menjëherë pas incidentit, në Prokurori kanë mbërritur forcat e Policisë së Komisariatit të Sarandës, të cilat kanë shoqëruar dy gratë e dyshuara dhe kanë marrë deklarimet e tyre.
Për shkak të një konflikti të mundshëm interesi, çështja do të hetohet nga Prokuroria e Gjirokastrës, nën akuzën e “kanosjes së gjyqtarit”, vepër e parashikuar nga neni 317 i Kodit Penal.
Pamjet filmike të regjistruara nga kamerat e sigurisë në ambientet e Prokurorisë së Sarandës janë sekuestruar dhe do të shërbejnë si provë kyçe në hetim.
Deri tani, emrat e prokurores dhe të dyshuarave nuk janë bërë publik.
