Të paktën tetë persona u plagosën në një sulm të dhunshëm të ndodhur të dielën në Boulder të Kolorados, gjatë një aktiviteti paqësor në mbështetje të pengjeve izraelite në Gaza.
Mes të lënduarve është edhe një 88-vjeçar, i mbijetuar i Holokaustit.
Ngjarja ndodhi rreth orës 13:26 me orën lokale, gjatë marshimit “Run for Their Lives”, që synonte ndërgjegjësimin për fatin e pengjeve të mbajtura nga Hamasi.
Sipas autoriteteve, agresori, Mohamed Sabry Soliman, 45 vjeç, shtetas egjiptian, përdori një flakëhedhës të improvizuar dhe koktej molotovi për të sulmuar turmën. Dëshmitarët thanë se ai bërtiste “Palestina e lirë” gjatë aktit të dhunës.
Të plagosurit janë katër burra dhe katër gra, të moshës 52 deri në 88 vjeç. Një prej tyre ndodhet në gjendje kritike.
Mes tyre është edhe një rabin hebre dhe drejtues i qendrës Chabad në Universitetin e Kolorados, i cili konfirmoi se një nga të lënduarit është një i mbijetuar i Holokaustit, të cilin e përshkroi si “njeri të dashur dhe simbol të gjallë të historisë”.
FBI dhe autoritetet lokale e po e trajtojnë rastin si një akt terrorizmi të motivuar ideologjikisht. Deri më tani, nuk ka prova që agresori kishte bashkëpunëtorë.
Hetimet janë shtrirë edhe në El Paso County, ku po verifikohen lidhje të mundshme me persona apo grupe të tjera.
Ngjarja ka ndodhur në prag të festës hebraike Shavuot, duke shtuar shqetësimet për sigurinë e komuniteteve hebraike në SHBA. Autoritetet kanë rritur masat e sigurisë në aktivitetet e planifikuara për ditët në vijim.
Kryebashkiaku i Boulder, Aaron Brockett, e cilësoi sulmin si një akt të neveritshëm dhe tha se qyteti do të qëndrojë i bashkuar kundër urrejtjes.
Ndërkohë, Liga Anti-Shpifje bëri thirrje për ndalimin e retorikës që nxit dhunën kundër hebrenjve dhe cilësoi ngjarjen si një sulm të rëndë kundër komunitetit.
