Në një artikull të “Daily Mail”, ekspertët e udhëtimeve e cilësojnë Shqipërinë si vendin më të përballueshëm në Evropë për pushime të mrekullueshme.
Ndërkohë, Ksamilin e veçojnë si një “perlë bregdetare” që i ofron turistëve ndjesinë e Maldiveve, por me kosto shumë më të ulët.
Ksamili, një fshat buzë Jonit në jug të Shqipërisë, po fiton gjithnjë e më shumë popullaritet si një alternativë buxhetore ndaj ishujve ekzotikë.
Ujërat e kristalta, plazhet me rërë të bardhë dhe peizazhet mahnitëse po e bëjnë këtë zonë një magnet për vizitorët që kërkojnë bukuri natyrore pa thyer buxhetin.
Ekspertët vlerësojnë se ky destinacion është perfekt për çiftet në muaj mjalti, por edhe për familjet apo udhëtarët solo.
“Ky është vendi më marramendës i Rivierës Shqiptare,” thuhet në artikull, ku përmendet edhe fakti që Ksamili ka më pak turistë sesa plazhet e ngarkuara të Sarandës.
Sipas “Lonely Planet”, Ksamili renditet mes plazheve më të mira në Shqipëri, falë bukurive natyrore dhe aksesit të lehtë në tre ishuj të vegjël përballë bregut. Një nga plazhet më të vlerësuara është “Ohana Beach Bar”, i cili ka marrë 4.4 yje në Tripadvisor.
Përveç detit, vizitorët mund të eksplorojnë edhe Parkun Arkeologjik të Butrintit, një sit i UNESCO-s vetëm 17 kilometra larg. Aty ndodhen rrënoja mbi 2,500 vjeçare, përfshirë një teatër antik dhe struktura të periudhës bizantine.
Shqipëria është gjithashtu shumë ekonomike për turistët. Një vakt në një restorant të zakonshëm kushton rreth 1,000 lekë (8.5 paund), një birrë lokale vetëm 249 lekë (2.13 paund) dhe një kapuçino 164 lekë (1.40 paund).
Për të mbërritur në Ksamil, udhëtarët nga Britania mund të fluturojnë drejt Tiranës ose Korfuzit. Nga Tirana janë rreth katër orë me makinë, ndërsa nga Korfuzi mund të merren tragetet për në Sarandë, vetëm 30 minuta larg nga Ksamil.
E quajtur “Maldivet e Evropës”, Ksamili po bëhet një nga destinacionet më të lakmuara për pushime luksoze me buxhet modest.
