FIFA ka vendosur të zbusë masat disiplinore ndaj Federatës Shqiptare të Futbollit, duke lejuar rikthimin e pjesshëm të tifozëve në tribunat pas porte për sfidën e rëndësishme kundër Serbisë, më 7 qershor.
Ky vendim vjen pas negociatave intensive mes FSHF-së dhe qeverisë botërore të futbollit, të cilat u zhvilluan pas dënimeve të vendosura për sjellje diskriminuese nga disa tifozë gjatë ndeshjes ndaj Andorrës. Burime për “Panorama Sport” bëjnë me dije se FIFA ka pranuar një plan të përmirësuar të hartuar nga FSHF për të luftuar diskriminimin dhe për të promovuar sjellje të përgjegjshme gjatë ndeshjeve.
Sipas marrëveshjes së arritur, pjesa e stadiumit që ishte parashikuar për mbyllje në masën 20% do të hapet për një përzierje të grupeve të komunitetit, organizatave që promovojnë barazinë dhe luftojnë diskriminimin, si dhe tifozëve tradicionalë të Kombëtares shqiptare. Qëllimi është krijimi i një atmosfere pozitive dhe gjithëpërfshirëse, ku mbështetja për ekipin përfaqësues do të shoqërohet me mesazhe të forta kundër çdo forme diskriminimi.
Ky zhvillim pritet të ndikojë pozitivisht jo vetëm në përkrahjen e skuadrës kuqezi në një përballje delikate, por edhe në përpjekjet e FSHF-së për të rritur ndërgjegjësimin dhe standardet etike në stadiumet shqiptare.
