Ambasada e SHBA në Tiranë ka ndarë një mesazh nga Samuel Samson, zyrtar i lartë në Byronë për Demokraci, të Drejtat e Njeriut dhe Punën pranë Departamentit Amerikan të Shtetit, ku theksohet rëndësia e vlerave të përbashkëta demokratike në marrëdhëniet me vendet partnere.
Në mesazhin e tij, Samson paralajmëron për rreziqet që i kanosen partneritetit transatlantik, nëse vihet në rrezik zgjedhja e lirë elektorale apo nëse ndodhin devijime nga parimet demokratike.
Ai shprehet kundër një “konformizmi globalist”, që sipas tij, dobëson sovranitetin dhe identitetin kombëtar.
“Kur shtypet fjala e lirë, kur lehtësohet emigrimi masiv, kur kufizohet shprehja e besimit dhe minohet zgjedhja elektorale, rrezikohen themelet e vetë partneritetit tonë transatlantik,” deklaron zyrtari amerikan.
Mesazhi u publikua nga Ambasada në faqet zyrtare të saj në rrjetet sociale, duke përcjellë një ton të qartë angazhimi për mbrojtjen e demokracisë.
