Detaje të reja janë bërë publike nga operacioni policor që çoi në arrestimin e 10 personave dhe shpalljen në kërkim të 2 të tjerëve, të përfshirë në një rrjet trafiku armësh nga Kosova drejt Shqipërisë.
Sipas hetimeve, grupi kriminal siguronte një pjesë të armëve në Kosovë dhe i transportonte drejt Shqipërisë me makina të vogla, duke ndjekur rrugë të ndryshme për të shmangur kontrollin.
Trafiku nuk kufizohej vetëm në importimin e armëve nga Kosova, por rrjeti kishte ngritur baza edhe brenda territorit shqiptar.
Policia ka identifikuar një prej bazave të grupit në Burrel, ndërkohë që janë dokumentuar raste shitjeje armësh edhe në Shkodër dhe Laç.
Çmimet për armët varionin nga 1500 deri në 2500 euro, kryesisht për pistoleta, përfshirë edhe marka si Glock, si dhe armë automatike.
Hetimet vijojnë për të dokumentuar tërësisht aktivitetin e grupit dhe për të arrestuar personat ende në kërkim.
