Mëngjesin e sotëm, në emisionin “Koha për t’u zgjuar” në News24, ishte i ftuar avokati Erald Aga, i cili foli mbi problematikat dhe sqarimet që lidhen me ligjin e vitit 2020, konkretisht për Aktin e Marrjes së Tokës në Përdorim dhe çështjet e legalizimeve.
Avokati ndaloi te dy shqetësimet kryesore që parashtrojnë qytetarët, vlefshmëria e AMTP-ve dhe procedurat e legalizimit.
Ai shpjegoi se ligji bën një ndarje të qartë mes AMTP-ve të regjistruara para hyrjes në fuqi të ligjit dhe atyre pas kësaj periudhe.
“Ato që janë regjistruar më parë, AMTP nuk i nënshtrohet vlerësimit të vlefshmërisë. Do t’i nënshtrohet vetëm për pjesën e falsifikimit”, tha Aga.
Ndërsa për rastet kur AMTP nuk është regjistruar ende, procedura është ndryshe.
“AMTP e pa regjistruara, do të bëjnë kërkesë në ASHK me AMTP përkatëse. Këtu kalon kriteri i vlefshmërisë”, sqaroi ai.
Në këtë rast, ligji vendos kritere të qarta edhe për mënyrën e përfitimit të tokës bujqësore.
Sipas Agës, personat që kanë paraqitur kërkesë për regjistrim gjashtë muaj përpara hyrjes në fuqi të ligjit, mund ta përfitojnë tokën bujqësore pa pagesë.
Ndërsa për ata që nisin procesin aktualisht, ligji parashikon detyrimin e një pagese: “Për qytetarët që duan ta regjistrojnë tani, ka një pagesë që duhet të kryhet”, u shpreh avokati.
