Pas përfundimit të zgjedhjeve parlamentare, janë bërë disa lëvizje dhe transferime në radhët e Policisë së Tiranës, që kanë përfshirë shefa krimesh, oficerë policie dhe drejtues në sektorë të ndryshëm.
Shefi i krimeve të Komisariatit Nr. 5 është transferuar në Vorë, ndërsa homologu i tij nga Komisariati i Vorës është emëruar në vendin e tij në Njësinë Nr. 5.
Ndërkohë, shefi i krimeve të Komisariatit Nr. 1 është zhvendosur në Policinë Rrugore të Tiranës, konkretisht në sektorin e aksidenteve.
Ndryshime janë bërë edhe në strukturën e Policisë Rrugore të kryeqytetit. Rreth 20 efektivë të patrullave dhe trafikut janë transferuar, përfshirë edhe katër komandantë të linjave dhe trafikut.
Mes tyre është edhe Jetnor Shira, shefi i trafikut urban në Tiranë, i cili është zëvendësuar nga Megian Ademaj. Gjithashtu, janë transferuar disa oficerë të policisë gjyqësore që operonin në këtë sektor.
Arsyet e këtyre ndryshimeve të shumta nuk janë bërë ende publike. Kujtojmë se vetëm shtatë muaj më parë u kryen reformime të thella në strukturën e Policisë së Shtetit, ku u emëruan 12 drejtues të rinj në qarqe dhe 48 shefa komisariatesh.
Megjithatë, gara për drejtuesit e rinj të departamenteve mbetet ende e pezulluar, ndonëse sipas ligjit të ri duhet të zhvillohet një proces përzgjedhës për këto pozicione.
