Një protestë po organizohet në Gramsh, ku prindërit do të mblidhen para Bashkisë për të kërkuar sqarime dhe masa pas infektimit të të paktën 17 fëmijëve me bakterin Salmonella Enteritidis në Kopshtin Nr. 1.
Nga 79 mostra të marra nga fëmijët, edukatorët dhe punonjësit e kuzhinës, janë konfirmuar 17 raste pozitive. Për më tepër, për 6 raste të tjera priten ende rezultatet, por dyshohet për infeksion.
Njësia Vendore e Kujdesit Shëndetësor në Gramsh ka bërë me dije se situata po monitorohet me kujdes dhe strukturat shëndetësore janë urdhëruar të marrin masa shtesë për parandalimin e përhapjes së infeksionit.
Njoftimi i plotë i Njësisë Vendore të Kujdesit Shëndetësor Gramsh:
“Ditët e fundit, në Kopshtin Nr. 1 janë shfaqur disa raste me simptoma gastrointestinale si diarre, temperaturë, të vjella dhe dobësi. Strukturat përkatëse kanë ndërmarrë menjëherë masa për hetimin dhe menaxhimin e situatës, ndërsa analizat laboratorike janë ende në proces për të përcaktuar shkakun.
Nga 79 persona të testuar, përfshirë fëmijët dhe stafin, 14 kanë rezultuar pozitivë me Salmonella Enteritidis. Prej tyre, 5 raste u zbuluan përmes testeve diagnostikuese, ndërsa 9 të tjerë u identifikuan gjatë depistimit masiv. Nga 72 mostra të tjera të testuara për depistim, 53 rezultuan negative, 6 pa rritje bakteriale, ndërsa për 6 të tjera pritet ende rezultati.
Në këtë situatë kërkojmë vigjilencë maksimale nga të gjitha Qendrat Shëndetësore për:
Vëzhgimin dhe identifikimin e çdo fëmije me simptoma të ngjashme.
Raportimin urgjent të çdo rasti të dyshuar pranë NJVKSH Gramsh.
Monitorimin e kujdesshëm të gjendjes shëndetësore të të gjithë fëmijëve të Kopshtit Nr. 1, pavarësisht nga rezultatet e tyre.
Informimin e komunitetit për rëndësinë e higjienës personale dhe ushqyerjes së sigurt të fëmijëve.
Lutemi për bashkëpunim të plotë dhe gatishmëri maksimale nga të gjithë për të menaxhuar këtë situatë me seriozitet dhe profesionalizëm.”
NJVKSH Gramsh
Drejtoreshë: Besmira Bracja
