Instituti i Shëndetit Publik ka bërë me dije se nga analizat e kryera te 79 fëmijët në një kopsht në Gramsh, 17 prej tyre kanë rezultuar pozitivë për baktere ‘Salmonella Enteritidis’.
Përveç këtyre, 6 fëmijë të tjerë po presin ende rezultatet, por analizat paraprake tregojnë se edhe ata kanë një rritje të ngarkesës bakteriale, që lë të kuptohet një infektim në zhvillim.
Në të njëjtën kohë, Agjencia Kombëtare e Ushqimit (AKU) ka nisur kontrollet dhe analizat e mostrave të ushqimeve që kanë konsumuar fëmijët në kopsht, për të identifikuar burimin e kontaminimit.
Salmonella Enteritidis është një bakter i lidhur kryesisht me mishin e pulës dhe vezët, ndërsa në Gramsh është duke vepruar një ekip i përbërë nga epidemiologë të ISHP dhe inspektorë të AKU, të cilët po kryejnë hetimet dhe inspektimet në terren për të siguruar kontrollin dhe parandalimin e përhapjes së infeksionit.
