Për herë të tretë që nga viti 2021, Kosova do të mirëpresë stërvitjen ushtarake ndërkombëtare më të madhe “Defender Europe 2025”, e drejtuar nga Ushtria e Shteteve të Bashkuara për Evropë dhe Afrikë.
Ky ushtrim synon të forcojë gatishmërinë dhe ndërveprimin operativ të Forcës së Sigurisë së Kosovës me forcat partnere nga rajoni, përfshirë Shqipërinë, Kroacinë, Maqedoninë e Veriut, Bullgarinë dhe SHBA-në.
Në të njëjtën periudhë, edhe Shqipëria do të marrë pjesë aktivisht në këtë stërvitje shumëkombëshe, që organizohet nën drejtimin e Komandës Evropiane të SHBA-së.
Forcat e NATO-s dhe partnerët e saj do të zhvillojnë manovra në territoret e Shqipërisë dhe Kosovës, duke u fokusuar në skenarë të ndryshëm operativë që lidhen me mbrojtjen e objekteve kritike, operacione sulmuese dhe mbrojtëse, si dhe sigurinë në pika kyçe të dislokimit.
Nga sot deri më 9 qershor, në Kosovë pritet lëvizje e konvojve ushtarakë nga bazat e FSK-së drejt Aeroportit të Gjakovës dhe poligonit ushtarak në Babaj të Bokës, ndërsa Ministria e Mbrojtjes apelon për mirëkuptim të qytetarëve për shkak të intensifikimit të aktivitetit ushtarak në terren.
“Defender Europe 25” është operacioni më i madh shumëkombësh i këtij lloji, me rreth 25 mijë ushtarë nga 29 vende anëtare dhe partnere të NATO-s.
Stërvitja organizohet çdo vit nga Ushtria Amerikane, me qëllim përmirësimin e gatishmërisë, besueshmërisë strategjike dhe forcimin e sigurisë kolektive në rajon.
Ministri i Mbrojtjes së Shqipërisë, Pirro Vengu, e përshkruan këtë aktivitet si një test të ndërveprueshmërisë dhe një mesazh të qartë për unitetin e NATO-s.
