Inspektorët e Autoritetit Kombëtar të Ushqimit morën sot mostra për analizë të tre llojeve të ushqimeve që dyshohen se shkaktuan helmimin e rreth 70 fëmijëve në një kopsht publik në Gramsh.
Gazetari i News24, Osman Stafa, raporton nga Gramshi se prindërit kanë vënë re simptomat te fëmijët që prej të premtes së kaluar, ndërsa vetëm sot AKU mori mostra nga mishi i pulës, qumështi dhe vezët për t’i dërguar në laborator.
Një prind tha se dy vajzat e tij frekuentojnë këtë kopsht dhe se strukturat drejtuese i kanë kërkuar të marrin fëmijët pasi u konstatuan rastet e para me salmonelë.
Ai shprehu shqetësimin për cilësinë e ushqimit, duke kërkuar që tenderi për furnizimin të mos jepet nga Tirana, për të siguruar ushqim më të freskët.
“Ne kërkuam që ushqimi të mos vijë nga Tirana, sepse donim siguri dhe freski. Nuk e dimë nëse mund të kemi besim që situata të mos përsëritet,” tha ai. Prindërit kanë paralajmëruar një protestë të hënën kundër autoriteteve përgjegjëse për këtë ngjarje.
Mjekët dhe familjarët dyshojnë se helmimi shkaktohet nga salmonela, një bakter i rrezikshëm që përhapet zakonisht përmes ushqimit të kontaminuar ose mungesës së higjienës.
Prokuroria e Elbasanit ka nisur hetimet për rastin e helmimit masiv në Gramsh, ku në fillim të javës u prekën dhjetëra fëmijë të kopshtit nr.1. Policia lokale ka sekuestruar kartelat klinike të 6 pacientëve të shtruar në spital, dokumentacionin e furnizimeve dhe kontrolleve të ushqimeve në kopsht, si dhe ka marrë mostra nga ushqimet për analiza laboratorike.
Hetimet përqendrohen tek zinxhiri i furnizimit, kushtet e ruajtjes së ushqimeve dhe higjiena në kuzhinën e institucionit.
Gjithashtu, produktet e mbetura në kuzhinë janë bllokuar, ndërsa të gjitha veprimet po kryhen nën drejtimin e Prokurorisë së Elbasanit.
Autoriteti Kombëtar i Ushqimit, në një njoftim mbrëmjen e kaluar, bëri me dije se informimi i parë erdhi nga Njësia Vendore e Kujdesit Shëndetësor në Gramsh, e cila njoftoi AKU dhe Institutin e Shëndetit Publik për rastin.
“Këto institucione po bashkëpunojnë me strukturat vendore për të bërë një vlerësim të plotë dhe të kujdesshëm të situatës, deri në përfundimin e analizave dhe nxjerrjen e rezultateve,” thuhet në komunikatën e AKU-së.
