Prej më shumë se katër orësh vijon në Gjykatën e Posaçme seanca për 14 të arrestuarit nga operacioni i SPAK kundër grupit kriminal të njohur si “Tropjanët e Durrësit”.
Në mesin e të ndaluarve ndodhet edhe ish-efektivi i RENEA-s, Altin Morina. Avokati i tij, Rigert Koni, i kërkoi prokurorisë të qartësojë rolet dhe episodet konkrete për secilin të pandehur, duke kundërshtuar përfshirjen e përgjithshme në një strukturë të përbashkët kriminale.
Sipas disa mbrojtësve, akuzat bazohen kryesisht në komunikimet e përgjuara përmes aplikacionit të koduar Sky ECC, të siguruara nga autoritetet italiane.
Ata kërkuan që prokuroria të sjellë prova të tjera përtej mesazheve të përgjuara për të vërtetuar përfshirjen reale të klientëve të tyre.
Deri më tani kanë dhënë deklarime 11 nga 14 të arrestuarit, ndërsa tre të tjerë pritet të dëgjohen.
Në sallën e gjyqit foli edhe avokati Armand Tragaj, një nga të arrestuarit, i cili dyshohet se ka ushtruar ndikim të paligjshëm dhe ka rezultuar përdorues i Sky ECC.
Ai kërkoi një masë sigurie më të butë, duke theksuar gjendjen e rënduar familjare: dy prindër të sëmurë, një njerkë të paralizuar, vëlla në trajtim psikiatrik dhe bashkëshorte me fëmijë të mitur.
Ai tha se ndodhet në një gjendje të rëndë psikologjike dhe vazhdimi i masës aktuale do të përkeqësonte situatën.
