Sot shënohen 26 vjet nga një ndër masakrat më të rënda të kryera gjatë luftës në Kosovë, masakra e Stagovës në komunën e Kaçanikut.
Më 21 maj 1999, forcat paramilitare serbe vranë mizorisht 13 civilë shqiptarë, përfshirë gra, të moshuar dhe një fëmijë 7-vjeçar, Fitim Gudaqi. Po atë ditë, në përpjekje për të mbrojtur civilët, ra dëshmor edhe luftëtari i UÇK-së, Ekrem Gudaqi.
Mes viktimave të kësaj masakre janë edhe Hanife Jaha, Selvije Krivanjeva, Baki Bela, Hanife Gudaqi, Ramush Jaha, Ibush Rrushi, Ramadan Dashi, Fahri Mani, Bahrije Elezi, Sevdije Guri, Hamdi Dashi dhe Brahim Dashi.
Masakra e Stagovës është radhitur ndër 15 më të rëndat gjatë luftës dhe ishte pjesë e dosjeve të hetuara nga Tribunali Penal Ndërkombëtar për ish-Jugosllavinë në Hagë.
Autopsitë dhe dokumentet e mbledhura nga ekipi ndërkombëtar konfirmuan krimet, por për këtë ngjarje, askush nuk është dënuar.
Përveç viktimave, regjimi i Millosheviqit shkaktoi dëme të mëdha edhe në infrastrukturën dhe pasurinë e banorëve. Nga 180 shtëpi që kishte fshati një ditë para masakrës, më shumë se 90 u dogjën dhe u shkatërruan, ndërsa u masakruan edhe bagëti të shumta.
Ky shkatërrim sistematik konsiderohet pjesë e përpjekjes për të fshirë çdo gjurmë të ekzistencës shqiptare në atë zonë, një akt që sipas përkufizimeve ndërkombëtare, përbën qëllim gjenocidal.
Për të nderuar kujtimin e të rënëve, sot në Stagovë do të zhvillohet një manifestim përkujtimor nën organizimin e Komunës së Kaçanikut dhe OVL-UÇK-së.
