Dy turistë kanadezë, që ishin ndarë nga grupi i tyre gjatë një ecjeje në zonën malore të Karaburunit, u shpëtuan mbrëmjen e djeshme nga Policia Kufitare e Vlorës, pasi humbën orientimin dhe nuk dinin të ktheheshin.
Rreth orës 23:00, salla operative e DVKM Vlorë mori njoftimin për ngjarjen dhe reagoi menjëherë duke organizuar një operacion shpëtimi.
Efektivët e Policisë Kufitare të Dhërmiut u nisën me mjet lundrues drejt Gjirit të Gramës dhe më pas vijuan kërkimet në këmbë, në një terren të vështirë dhe në errësirë të plotë.
Brenda një ore, rreth orës 24:00, dy turistët u lokalizuan dhe u gjetën në gjendje të mirë shëndetësore.
Ata u shoqëruan drejt Gjirit të Gramës dhe iu bashkuan pjesës tjetër të grupit, duke shprehur falënderime për reagimin e shpejtë dhe profesional të Policisë së Shtetit.
Policia Kufitare e Vlorës vijon të mbetet në gatishmëri për garantimin e sigurisë së qytetarëve dhe turistëve, sidomos në zonat më të thella dhe të vështira për t’u aksesuar.
