Një ngjarje e rëndë është shënuar në orët e para të mëngjesit të sotëm në një lokal në zonën e Komunës së Parisit në Tiranë, ku një 28-vjeçar është vetëplagosur aksidentalisht me armë zjarri që e mbante pa leje.
I riu, K. K., pas plagosjes në këmbë, është paraqitur në spital rreth orës 01:20 për të marrë ndihmë mjekësore.
Policia u vu menjëherë në lëvizje dhe, pas hetimeve të shpejta, zbardhi dinamikën e incidentit.
Si rezultat, u arrestuan tre persona: vetë i plagosuri, K. K., 28 vjeç, A. C., 33 vjeç, si dhe A. M., 30 vjeç, kamarieri i lokalit ku ndodhi ngjarja.
Ndërkohë, është shpallur në kërkim E. E., 41 vjeç, banues në Kuçovë, i dyshuar se ka ndihmuar në fshehjen e armës së përdorur.
Sipas burimeve zyrtare, pas të shtënës, A. C. dhe E. E. kanë marrë armën dhe gëzhojën, duke i fshehur jashtë ambientit, ndërsa kamarieri ka ndërhyrë për të pastruar gjurmët.
Policia ka sekuestruar armën e zjarrit, një pistoletë e tipit ende të paidentifikuar plotësisht.
28-vjeçari ndodhet nën kujdesin e mjekëve dhe është jashtë rrezikut për jetën.
