Shpendi Malo, 34 vjeç, është një ndër emrat më të kërkuar në Europë, i shpallur në listën “Europe’s Most Wanted” nga Europol, nën dyshimin për një vrasje të rëndë të ndodhur në Gjermani në vitin 2019.
Më 11 shtator të atij viti, Malo dyshohet se ka joshur një 27-vjeçar shqiptar drejt një pylli urban në Halle (Saale), të quajtur Dölauer Heide.
Aty, sipas autoriteteve, ai e ka qëlluar me thikë duke i shkaktuar vdekjen në vend. Për të fshehur krimin, trupi u tërhoq drejt një kanali dhe u mbulua me gjethe. Kalimtarë të rastësishëm e zbuluan trupin pas katër ditësh.
Hetimet nuk kanë përcaktuar ende një motiv të qartë për krimin, por dyshimet çojnë drejt një konflikti të mundshëm të lidhur me trafikun e drogës. Nuk përjashtohet as mundësia që Shpendi Malo të ketë pasur bashkëpunëtor, pasi disa prova sugjerojnë praninë e një personi të dytë.
Europoli e cilëson Malon si individ të rrezikshëm dhe u bën thirrje qytetarëve që të mos i afrohen, por të njoftojnë menjëherë autoritetet në rast se e shohin.
Për identifikimin e tij, policia jep disa detaje të veçanta fizike, flokë të drejtë dhe të errët, trup i dobët, si dhe disa nishane në fytyrë, njëri prej të cilëve më i madh ndodhet poshtë syrit të djathtë.
