Të paktën 62 persona humbën jetën në Rripin e Gazës si pasojë e një vale të re sulmesh ajrore izraelite gjatë natës.
Goditjet u përqendruan në rreth nëntë zona në jug të territorit, ku më e goditura rezultoi qyteti i Kan Junisit.
Ndërkohë, në pjesën veriore të Gazës, ushtria izraelite ka urdhëruar evakuimin e banorëve nga disa lagje, duke paralajmëruar ndërhyrje intensive ushtarake.
Paralelisht, bllokada ndaj ndihmave humanitare mbetet e pandryshuar asnjë furnizim nuk është lejuar të hyjë në territor prej më shumë se 10 javësh.
Situata në terren është dramatike, me qytetarë të rraskapitur nga bombardimet dhe uria. Agjencitë humanitare raportojnë për një përkeqësim të shpejtë të kushteve të jetesës dhe bëjnë thirrje për ndërhyrje të menjëhershme.
Në shënjestër të sulmeve janë vënë edhe objektet shëndetësore.
Dy spitale janë goditur brenda një dite, duke shkaktuar viktima dhe të plagosur mes pacientëve dhe personave të strehuar aty.
