Një incident i rëndë ka ndodhur në mesditë në ambientet e KZAZ nr. 30 në Kashar, ku është ndërprerë procesi i numërimit të votave pas një përplasjeje të dhunshme mes vëzhguesve dhe anëtarëve të komisionit.
Sherri nisi pas kontestimit të një flete votimi me dy emra kandidatësh, ku përfshihej edhe kandidati i Partisë Socialiste, Ornaldo Rakipi. Vëzhguesit e tij kërkuan që vota të quhej e vlefshme në favor të Rakipit, çka solli debat me Sekretarin e KZAZ-së.
Në përplasjen që pasoi u përfshinë katër persona me status vëzhguesi, ndërsa dy prej tyre janë shoqëruar nga policia.
Tensioni bëri që numërimi të ndalej menjëherë, ndërsa forcat e rendit vendosën perimetrin e sigurisë në vendngjarje.
Ndërkohë, pranë ambienteve të KZAZ-së është vënë re një automjet në të cilin ndodhej një çantë me para. Mjeti ndodhet brenda zonës së siguruar dhe është marrë në shqyrtim nga policia.
Në Tiranë deri tani janë hapur 839 nga 1282 kuti për votat preferenciale.
