Prokuroria Speciale e Kosovës ka bërë të ditur se mëngjesin e së mërkurës është arrestuar M.D., shtetas serb, nën dyshimin për përfshirje në krime lufte gjatë viteve 1998-1999 në komunën e Zveçanit.
Arrestimi është bërë me urdhër të prokurores speciale Florije Salihu Shamolli, pas disa muajsh hetimesh në bashkëpunim me Hetuesit e Krimeve të Luftës.
Sipas dosjes hetimore, M.D. akuzohet se, në rolin e komandantit të Njësisë së Policisë në kuadër të Ministrisë së Punëve të Brendshme të Serbisë, ka marrë pjesë në vrasje, dëbime, plaçkitje, tortura dhe rrahje ndaj civilëve shqiptarë.
Një nga rastet konkrete për të cilat dyshohet është ai i prillit 1999, kur M.D., në bashkëpunim me forcat serbe përfshirë Ushtrinë Jugosllave dhe Policinë Serbe mori pjesë në një operacion në fshatin Zhazhë, ku u vranë shtatë civilë shqiptarë.
Më pas, trupat e viktimave u gjetën në varrezat e fshatit Suhodoll, në komunën e Mitrovicës.
Prokuroria ka njoftuar se brenda afatit ligjor do të dorëzojë në Gjykatën Themelore të Prishtinës, Departamenti Special, kërkesën për caktimin e masës së paraburgimit për të pandehurin.
