Sali Berisha ka njoftuar zyrtarisht përmes rrjeteve sociale se më 16 maj, në orën 17:00, Partia Demokratike do të zhvillojë një protestë në Bulevardin “Zogu I”.
Me sloganin “Grabisin zgjedhjet për të zhvatur Shqipërinë!”, protesta vjen vetëm gjashtë ditë pas zgjedhjeve të 11 majit dhe synon të sfidojë rezultatin zyrtar të votimeve.
Ndërkohë, një ditë para protestës, të enjten, Berisha do të udhëtojë drejt Brukselit për të marrë pjesë në samitin e Bashkimit Demokratik Ndërkombëtar (IDU), një platformë globale e partive të qendrës së djathtë.
Udhëtimi i tij, sipas burimeve nga PD, do të zgjasë vetëm një ditë, pasi të premten ai pritet të udhëheqë protestën në kryeqytet.
Protesta e thirrur për të kundërshtuar procesin zgjedhor pritet të zhvillohet në të njëjtën ditë kur Tirana do të presë Samitin e Komunitetit Politik Europian, ku do të jenë të pranishëm liderë të BE-së, Mbretërisë së Bashkuar dhe vendeve kandidate.
Samiti do të mbahet në Sheshin Skënderbej, duke shtuar peshën simbolike dhe politike të momentit që ka zgjedhur opozita për të protestuar.
