Një hotel luksoz i ndërtuar mbi pronë të kontestuar në bregdetin e Lukovës ka nxjerrë në pah një rrjet të ngjeshur të korrupsionit, ndikimit në drejtësi dhe mungesës së transparencës institucionale, që përfundoi me shpalljen e ndërtuesit si “investitor strategjik” në Dhërmi. Historia nis në vitin 2020 me një kallëzim penal dhe përfundon në vitin 2024 me privilegje shtetërore për një sipërmarrës me të shkuar kriminale.
Hoteli mbi një tokë të “vjedhur”
Në mars 2020, Ashimaq Kokaveshi denoncoi në Komisariatin e Himarës ndërtimin e një hoteli mbi tokën e tij në Lukovë, pa leje ndërtimi dhe me shkelje të dokumenteve pronësore. Të njëjtën gjë deklaruan edhe Vasillaq Gjezo dhe Dhimitër Kokaveshi, duke pohuar se rreth 1,200 m² tokë u morën me falsifikim dokumentesh për t’i hapur rrugë ndërtimit të “Prado Luxury Hotel”.
Denoncimi u referua në Prokurorinë e Vlorës me procedimin penal nr. 669/2020, por vetëm dy muaj më pas, më 28 maj 2020, prokurori Erjon Shaqiri vendosi mosfillimin e hetimeve, duke e justifikuar me mungesën e elementëve të veprës penale.
SPAK zbardh skemën e ndërhyrjes në drejtësi
Hetimet e Prokurorisë së Posaçme, të publikuara më 4 janar 2025, zbuluan se pas këtij vendimi qëndronin tentativa korruptive për të ndikuar prokurorin e çështjes. Në përgjimet e SKY ECC përmenden shuma 2,000–3,000 euro si “pagesë” për mbylljen e hetimit, ndërkohë që përfshirë në këtë rrjet ndikimi ishin ish-kreu i Prokurorisë së Vlorës Aurel Zarka, oficerja Eriona Daupaj, avokati Radovan Çela dhe biznesmeni Astrit Vladi.
Avokati Çela luajti rolin kyç në ndërhyrjen e paligjshme, duke garantuar mbylljen e çështjes dhe mbikëqyrur shpërndarjen e pagesës, në këmbim të heshtjes institucionale.
Kompensim i pashlyer dhe mungesë transparence
Pas mbylljes së dosjes, banori Ashimaq Kokaveshi u detyrua të nënshkruante dy kontrata me kompaninë “Building Construction” për kompensimin e tokës së uzurpuar. Ai pranoi një çmim të ulët për tokën e tij, por deklaron se deri më sot nuk ka marrë asnjë pagesë, ndonëse hoteli vijon të operojë si një prej resorteve më luksoze të rivierës.
Nga Lukova në Dhërmi: status strategjik për Mezinin
Një vit pas mbylljes së çështjes, Mentor Mezini, pronar i “Building Construction”, përfitoi statusin e “investitorit strategjik” për projektin “Drymades Beach Resort” në Gjilekë, Dhërmi. Ky status, i dhënë më 11 korrik 2024 nga Komiteti i Investimeve Strategjike, i siguroi Mezinit mbështetje institucionale dhe privilegje administrative, pa u kryer verifikimi ligjor i figurës së tij.
Sipas Ligjit Nr. 55/2015, investitorët strategjikë nuk mund të kenë rekorde penale për vepra që lidhen me krimin e organizuar apo pastrimin e parave. Por AIDA nuk ka kryer asnjë kontroll mbi të kaluarën e Mezinit, i cili sipas hetimeve të SPAK dhe raportimeve mediatike, njihet edhe me nofkën “Tor Lushnjari” dhe ka lidhje me rrjete kriminale, përfshirë familjen Çopja dhe vëllezërit Merkaj.
12 milionë euro për një projekt strategjik
Pak muaj pas përfitimit të statusit “strategjik”, në prill 2025, Mezini shiti 100% të kuotave të “Bluebay” për 12 milionë euro te tre kompani të lidhura me biznesmenin Pjerin Fushaj. Projekti “Drymades Beach Resort”, i parashikuar me vlerë investimi 6.3 milionë euro, parashikon ndërtimin e 110 dhomave dhe punësimin e 165 personave.
Ky është rasti i parë ku një projekt “strategjik” ndërron pronar në një kohë kaq të shkurtër, çka ka ngjallur dyshime për pastrim parash dhe riciklim të kapitaleve kriminale.
Ekspertiza: Kjo është kapje e shtetit
Zef Preçi, drejtor i Qendrës për Kërkime Ekonomike, deklaron se rasti i Mezinit është tregues i kapjes së shtetit nga krimi i organizuar.
“Përfshirja e individëve me të shkuar kriminale në radhët e investitorëve strategjikë nuk është rastësi, por provë e bashkëjetesës së krimit me politikën,” tha Preçi.
Sipas tij, skema të tilla deformojnë konkurrencën, favorizojnë pastrimin e parave, dhe përdoren për financimin e paligjshëm të partive në pushtet.
Heshtje institucionale
As Agjencia e Investimeve Strategjike dhe as Mentor Mezini nuk kanë dhënë koment mbi akuzat dhe dokumentet e zbuluara nga “shteg.org”. Rasti i “Drymades Beach Resort” ilustron qartë sesi përmes një vendimi institucional, një individ me të kaluar të dyshimtë kriminale, mund të legjitimohet dhe të përfitojë miliona euro përmes skemash që minojnë besimin në drejtësi dhe ekonominë formale.
