Detaje të reja kanë dalë nga ngjarja e rrëmbimit të Edvar Agalliut, 68 vjeç, i cili u mbajt peng në një banesë të braktisur në Kakunjë të Tiranës, me qëllim për të përfituar një shpërblim financiar.
Sipas hetimeve të Policisë së Tiranës, pengmarrja është organizuar me paramendim dhe nisi përmes një gruaje, Nikoleta Begolli, 32 vjeçe, e cila u përdor si karrem për të joshur viktimën.
Agalliu kishte krijuar një marrëdhënie me Begollin, pa e ditur se ajo ishte në një lidhje me një prej rrëmbyesve, Sulejman Sina.
Mësohet se Begolli e kishte ftuar 68-vjeçarin për një takim në zonën e “Pazarit të Ri”, ku ai u kap dhe u fut me forcë në një makinë nga Sulejman Sina, vëllai i tij Klinton Sina dhe Idajet Mashollari.
Pas rrëmbimit, Agalliu u çua në një shtëpi të pabanuar në zonën kufitare me Elbasanin, ku u mbajt peng, ndërsa autorët kërkuan 2 milionë lekë nga familjarët e tij në këmbim të lirimit. Paratë, sipas policisë, u dorëzuan në zonën e Saukut te një 57-vjeçar me emrin Bajram Ibraliu.
Policia ka identifikuar dhe arrestuar pesë persona të përfshirë në këtë ngjarje: vëllezërit Klinton dhe Sulejman Sina (21 dhe 31 vjeç), Idajet Mashollari (21 vjeç), Nikoleta Begolli (32 vjeç) dhe Bajram Ibraliu (57 vjeç). Sulejman Sina rezulton të jetë një person me precedentë penalë, i dënuar më parë për vjedhje me dhunë.
Pamjet e kamerave të sigurisë që dokumentuan momentin e rrëmbimit ndihmuan autoritetet në identifikimin e grupit dhe ndërhyrjen e shpejtë për arrestimet.
Gjatë kontrolleve, policia sekuestroi 1 746 000 lekë të dyshuara si pjesë e shumës së përfituar nëpërmjet shantazhit.
Tashmë, materialet janë referuar Prokurorisë së Tiranës për hetime të mëtejshme.
