Gjykata Themelore e Prishtinës ka lëshuar një fletarrestim për Millan Radoçiçin dhe 19 serbë të tjerë, të dyshuar për krime lufte kundër popullatës civile.
Radoçiçi, ish-nënkryetar i Listës Serbe, akuzohet se ka qenë pjesë e një grupi që vrau 106 civilë shqiptarë në vitin 1999, trupat e të cilëve më vonë u gjetën në një varrezë masive në Serbi.
Sipas Prokurorisë Speciale të Kosovës, hetimet kanë filluar për këta individë, duke u bazuar në dyshimet se ata ishin pjesë e forcave serbe që, nga 7 deri më 10 maj 1999, kryen masakra në Gjakovë, duke ndarë burrat nga gratë dhe fëmijët dhe më pas i ekzekutuan.
Po ashtu, grupi dyshohet se ka arrestuar dhe mbajtur mbi 300 civilë shqiptarë, të cilëve u mohoheshin të drejtat bazë.
Pas luftës, trupat e viktimave u gjetën në Batajnicë të Serbisë. Dokumenti i lëshuar nga Gjykata thekson se shumë nga të arrestuarit u liruan pas qershorit të vitit 1999 me ndihmën e organizatave ndërkombëtare.
Ndërkohë, autoritetet kosovare ende nuk e dinë vendndodhjen e të pandehurve, duke përfshirë edhe Llazar Drashkoviqin, i kërkuar për lidhje me masakrën e Mejës.
Radoçiçi gjithashtu është kërkuar për sulmin e vitit 2023 në Banjskë të Zveçanit, ku një oficer i Policisë së Kosovës humbi jetën./ REL
