Policia e Tiranës ka parandaluar një ngjarje të rëndë kriminale brenda një familjeje.
Një 48-vjeçar, i cili ndodhej nën masën e sigurisë “arrest në shtëpi”, është arrestuar në flagrancë pasi kanoste bashkëshorten dhe djalin e tij me një hanxhar.
Ngjarja ka ndodhur mbrëmjen e djeshme në një banesë në rrugën “Haki Stërmilli”. Pas marrjes së njoftimit, shërbimet e Komisariatit Nr. 6 kanë ndërhyrë në kohë, duke parandaluar një tragjedi të mundshme dhe duke neutralizuar autorin, shtetasin E. B., 48 vjeç, banues në Tiranë.
Gjatë kontrollit, Policia ka sekuestruar hanxharin me të cilin ai po kanoste familjarët e tij. Verifikimet kanë treguar se E. B. ndodhej në masën “arrest në shtëpi” për një çështje të mëparshme që lidhet me veprën penale “vjedhja”.
Materialet për këtë ngjarje janë referuar në Prokurorinë e Tiranës për veprime të mëtejshme ligjore.
